V’r sjrieve Neel vanaaf ’t jaor net efkes veur 950 v.C. Det is dus al ’ne hele tied. Zolang zeen v’r al Neel en later Mesjneel. Toet ’t jaor 1959. Alles waerde d’r aan gedaon om neet mèt Remunj hove same te gaon. Toet 4 keer toe had Neel de zake kinne aafwende. Maar 1959 waar ’t jaor van de annexatie. Groot-Remunj waar gebaore en ze hadde Neel d’r veur neudig!
In die veurgaonde jaore deje Sjepene zake met ’t Remunj van toen. ‘T Waar dudelik waat Neel waar en waat neet. De taak van ’ne Sjepene waar wie ‘ne juris, ‘ne Wethaajer of Börgervader. Dees miense zeen noe vertaegewaordigd inne Vastelaovestied Prins van det sjtökske landj in ’t grote Remunj.
In Neel höbbe veer os eige identiteit, en staon aope veur eiderein waat Vastelaovendj ‘n werm hert toedreug. Mer Neel wilt auch gaer 1 x per jaor inne Vastelaovestied ein eige sjtökske grondj in ’t Grote Remunj. Dit om aan te gaeve det väöl kint en moog tiedes de Vastelaovend. Maar auch óm oet te drage det Neel ein toplocatie is om Vastelaovend te viere. Want op zunjig 11 fibberwarie is in Neel de Vastelaoves Villaasj, ‘n podium veur ‘n carnavalesk aopenlóchtejater .
Óm baovesjtaonde oet te drage, te promote en te verkóndige, zal op donderdig 28 december 2017 in Kefee De Pauw aan de Roerkade ´n sjtökske Neel waere ingenaome door Neelder miense. Det alles in aanvoering van eine nuje Sjepene, in dit geval de Neelder Ambassadeur. Deze Ambassadeur zal plaatsneme op ’t bordes van de Neelder Ambassade en verkondige det ’t Neelder vastelaoves fees en de Sjtadse Vasteloavesfeeste same kinne gaon! Mèt oeteraard ‘n kleine knipoug nao ’t truukpakke vanne eige bevoeghede als Neel inne Grote Sjtad Remunj.
’t Program waert omlies door optraejes van de prinsekepelle van De Katers en D’n Uul, sjtadsvastelaovesdichter Marc Latta, de Neeldergarde en nog väöl meer. De äöpening van de Neelder ambassade begint óm 20.15 oer.
